Við skólann er starfandi áfallaráð. Áfallaráð skipuleggur og framkvæmir sérstaka áætlun þegar fyrirfram skilgreind vá steðjar að skólanum, t.d. dauðsfall nemanda, kennara eða alvarlegt slys/sjúkdómur fyrrgreindra aðila. Áfallaráð fer með verkstjórn og styður kennara í aðhlynningu við nemendur. Foreldrar/forráðamenn eru vinsamlega beðnir að snúa sér til skólastjórnenda ef þeir vilja koma boðum til ráðsins.
Hvað er áfall?
Orðabók Menningarsjóðs skilgreinir hugtakið á eftirfarandi hátt: Áfall; slys, tjón, mótlæti, þungbær reynsla eða sjúkdómur. Einstaklingurinn (börn og fullorðnir) upplifir ógnvekjandi vanmáttarkennd þar sem leiðir til úrbóta eru ekki fyrir hendi eða ekki augljósar.
Hlutverk áfallaráðs er að
- Hlúa að nemendum og starfsfólki sem verður fyrir áföllum.
- Sjá um að ákveðið ferli eigi sér stað (verkstjórn) við eftirfarandi atburði
- slys á nemendum / starfsfólki í, eða til og frá skóla
- slys í skólaferðalagi
- dauðsfall nemanda / starfsmanns
- náttúruhamfarir
- Útbúa / endurskoða áætlun um viðbrögð fyrir skólann.
- Kynna áætlunina fyrir starfsfólki.
- Gera foreldrum grein fyrir mikilvægi þess að skólinn fái vitneskju um allar þær breytingar sem verða á högum barns s.s. alvarleg veikindi, andlát eða annað sem hefur áhrif á líðan og hegðun barnsins.