Fólkið í blokkinni

Vigga er 11 ára og býr ásamt fjölskyldu sinni á níundu hæð í blokk í Hólunum. Hún hefur frá ýmsu að segja, enda er lífið í blokkinni ótrúlega fjölbreytt. Það býr margt skondið og skemmtilegt fólk. Sögurnar af fólkinu í blokkinni eru sprenghlægilegar en þó um leið svo raunsannar að allir sem einhvern tíma hafa búið í blokk hrópa: Einmitt svona er þetta.

Við kynnumst fjölskyldu Viggu sem samanstendur af Óla bróður (8 ára), Söru systur (16 ára), Tryggva pabba (42 ára) og Sjólu mömmu (39 ára). Á yfirborðinu er þetta ósköp venjuleg íslensk fjölskylda en þegar nánar er athugað er hún auðvitað skemmtilega brengluð eins og flestar aðrar fjölskyldur sem maður þekkir.

Óli er mikill hrakfallabálkur og gífurlega uppátækjasamur. Hann safnar gæludýrum, allt frá ánamöðkum að útigangsmönnum, áhugamál sem er að gera mömmu hans gráhærða. Sara systir er ekki eins og flestir unglingar því hún virðist vera rammgöldrótt og mjög efnileg norn. Tryggvi reynir að gera sitt besta til að koma í veg fyrir að sonurinn fari sér að voða og á sama tíma halda friðinn í blokkinni. Sjóla er kennari og berst við að koma vitinu fyrir börnin sín og eiginmanninn.

Þó að fjölskyldan á 9. hæðinni sé rauði þráðurinn í verkinu þá eru það aðrir íbúar og gestir í blokkinni sem mynda vettvang sögunnar sem Vigga segir okkur. Sjálft fólkið í blokkinni er af öllum toga og hvert öðru litríkara. Hundfúll húsvörður, frönsk hefðarfrú, símadama með félagsfælni, þunglyndur leikari, flóttamaður frá Rúanda o.fl.

Vinsælir sjónvarpsþættir voru gerðir eftir sögunum af Fólkinu í blokkinni.