Þetta skólaár mun skólinn innleiða verkefni sem heitir Vinaliðar. Í upphafi er unnið eftir því í 4.–6. bekk og stefnt er að því að taka það upp í öllum skólanum ef vel tekst til. Verkefnið hefur farið mjög vel af stað og í morgun kom langþráður kassi frá Noregi fullur af leikföngum sem verða notuð í leik í útivistinni.Vinaliðaverkefnið er sett upp þannig að vinaliðar eru valdir af bekkjarfélögum sínum og skipuleggja þeir leiki og hreyfingu í löngu frímínútum skólans. Vinaliðar mega ekki hafa orðið uppvísir að eineltisþátttöku, annars fá þeir ekki hlutverkið. Verkefnið er upprunnið í Noregi þar sem 785 skólar hafa tekið verkefnið upp með góðum árangri.
Markmið vinaliðaverkefnisins er að:
- Stuðla að fjölbreyttari leikjum í löngu útivistinni.
- Leggja grunn sem gerirnemendum kleift að tengjast sterkum vinaböndum.
- Minnka togstreitu milli nemenda.
- Hampa góðum gildum, svo sem vináttu, virðingu og því að allir fái að taka þátt.
Samhliða góðum eineltisáætlunum er markmiðið með Vinaliða-verkefninu einnig að draga úr einelti og auka vellíðan nemenda í skólum.