Upplestrarhátíð í 7. bekk

Ritstjórn Fréttir

Upplestrarhátíð í 7. bekk var haldin þann 10. mars í Grunnskólanum í Borgarnesi og var þetta fyrsti viðburðurinn sem haldinn er í nýjum samkomusal skólans. Þar voru valdir þrír nemendur sem munu, síðar í mánuðinum, taka þátt í lokahátíð Stóru upplestrarkeppninnar á Vesturlandi.
Það var ekki auðvelt hlutskipti dómara að velja fulltrúa skólans þar sem allir þátttakendur stóðu sig með prýði og höfðu greinilega undirbúið sig vel.
Fulltrúar skólans verða þau Eyjólfur Ágúst Hjörleifsson, Þorsteinn Logi Þórðarson og Friðmey Hekla Þórdísardóttir og varamaður er Benjamín Mager Hlynsson.
Stóra upplestrarkeppnin í 7. bekk hefst ár hvert á degi íslenskrar tungu þann 16. nóvember og lýkur í mars með því að valdir eru þrír bestu upplesarar í hverju byggðarlagi, eða í umdæmi hverrar skólaskrifstofu.

Keppnin skiptist í tvo hluta, ræktunarhluta og keppnishluta.

Ræktunarhlutinn er sá hluti upplestrarkeppninnar sem mestu máli skiptir. Hann miðast við tímabilið frá degi íslenskrar tungu þann 16. nóvember og fram í lok febrúar. Á þessu tímabili er lögð sérstök rækt við vandaðan upplestur og framburð.

Hátíðarhlutinn er það sem kalla mætti hina eiginlegu „keppni“. Hann er í tvennu lagi. Annars vegar er upplestrarhátíð í hverjum skóla þar sem tveir til þrír nem­endur eru valdir til áframhaldandi þátttöku í keppninni fyrir hönd skólans. Hins vegar er lokahátíð í héraði sem haldin er í mars. Þar koma saman fulltrúar skólanna í héraðinu, einn til þrír úr hverjum skóla, og lesa ljóð og laust mál sem þeir hafa undirbúið.

Hafa ber í huga að „keppnin“ er í raun aðeins formsatriði, nokkurs konar staðfesting á þeim árangri sem náðst hefur í skólastarfinu, og því miklu meir í ætt við uppskeruhátíð. Ekki skiptir máli hver sigrar, heldur það að tekist hafi að virkja nemendur til að vanda upplestur sinn um veturinn.