Umhverfisnefnd er skipuð fjórum starfsmönnum skólans, einum fulltrúa foreldra og einum fulltrúa nemenda úr hverjum árgangi. Umhverfisnefnd fundar reglulega og setur sér markmið til að vinna að.
Helstu markmið umhverfisnefndar á skólaárinu 2018 – 2019 voru eftirfarandi: Að takmarka sorp og flokka betur; að nýta pappír vel og draga úr pappírsnotkun; að fara vel með allar eigur skólans; að koma óskilamunum í réttar hendur og loks að leggja áherslu á ýmiss konar fræðslu um umhverfismál.
Dagana 8. – 10. maí var skólastarfið helgað umhverfinu með ýmsum hætti. Meðal viðfangsefna voru útivist og útikennsla, fræðsla og tenging við Grænfánaverkefnið. Fulltrúar frá Landvernd komu í skólann og fluttu fyrirlestur um vandamál sem við blasa vegna mikils úrgangs og leiðir til úrbóta. Haldinn var svokallaður óskilamunadagur og í lok hans höfðu tæp 11 kíló af fatnaði og öðrum óskilamunum ratað í hendur réttra eigenda.
Nemendur hreinsuðu rusl í nágrenni skólans og fegruðu umhverfið á marga vegu. Nemendur á unglingastigi tóku til dæmis að sér að mála og lagfæra leiktæki á Bjössaróló í samstarfi við Borgarbyggð.
Grunnskólinn í Borgarnesi hefur tekið þátt í Grænfánaverkefninu frá upphafi þess og stefnir á það áfram. Grænfánaverkefnið stuðlar að aukinni umhverfisvitund, jákvæðum áhrifum í umhverfismálum á nærsamfélagið, lífsvenjum í anda sjálfbærni, lýðræðislegum vinnubrögðum og styrkir umhverfisstefnu skólans.
Með fréttinni fylgja nokkrar myndir frá umhverfisdögunum.
