Árlegt jólaútvarp Nemendafélags Grunnskóla Borgarness verður dagana 6.-10. desember frá kl. 10:00 – 23:00.

Fjölbreytt og skemmtileg dagskrá verður í boði. Fyrri hluta dags verður útvarpað áður hljóðrituðum þáttum yngri bekkja grunnskólans en síðan flytja unglingarnir sína þætti í beinni útsendingu. Handritagerð fór fram í skólanum þar sem jólaútvarpið hefur verið tekið sem sérstakt verkefni í íslenskukennslu og upplýsingatækni. Fréttir og veður verða daglega kl. 12.30 og hápunktur fréttastofunnar verður eins og undanfarin ár þátturinn Bæjarmálin í beinni föstudaginn 10. des. kl. 13:00. Þá er von á góðum gestum í hljóðstofu.